青蛙王子（01259）上市至今都算禍不單行，不時成為狙擊獵物，今次仲要畀以沽空聞名嘅Glaucus Research單挑，搞到股價急瀉又停牌。絲絲聽唔少大行老友講，公司前日開始已不停四圍搵分析員拆彈。尋日朝早再度急Call解畫會議，可惜CFO洪芳有口難言，得番投資關係部主管主持大局，搞到要向與會投資者「耍冧」。
其實，洪總並唔係因為前日向投資者不停解釋，而講到失聲，而係因技術問題，電話打唔入電話會議，於是乎尋日朝成個會議淨係得IR主管代表公司解說，因為CEO兼主席李振輝都正在出差中。不過聽聞李總已經趕返嚟救亡，公司亦同安永會計師事務所開咗董事會議，目標係日內發澄清公告再復牌。
經過多次中招經驗，青蛙王子都知，投資者最關心公司股價急插嘅問題。
有人獻計，叫佢哋回購公司股份，以示對公司信心，據聞佢哋都會考慮。為求真正化解Glaucus報告嘅危機，公司已聯絡該報告引用嘅資料來源者，包括兩間調研機構，希望抽絲剝繭，搵出報告中嘅錯處同埋疑點，誓要還自己清白。
余詩韻