內地A股過去一年暫停新股上市，搞到班內地iBanker無啖好食，原本豐厚嘅年終獎金，因為IPO暫停而大縮水，人工又一減再減，月薪得番幾千蚊人仔。 但係工作壓力一啲都冇小到，為咗早排中證監嘅財務專項審查，冇終止嘅OT，同全國各地馬不停蹄嘅核查，可以話係家常便飯，搞到好多iBanker勁呻成個行業已經愈嚟愈「民工化」。
以前講起iBanker，大家即時諗到揸跑車飲紅酒嘅奢華生活，可惜風光不再。舊年起整個行業掀起炒人潮，投行血流成河，就算有公司頂住壓力冇炒人，都會暗地裏縮皮，樣樣津貼都話要減。
有內地iBanker呻最近好多同事轉工，事關個行業已經愈嚟愈冇前景，一、二線城市嘅項目愈嚟愈少，大家要長期出差留喺啲三、四線城市，人工又同「民工」睇齊，不如轉行好過喇。