絲絲講場：上市新股齊齊獻「藝」
尋日有六隻新股一齊上市，令港交所（00388）交易大堂頓時變得人頭湧湧，直頭賓墟咁嘅場面。為咗爭取多啲曝光率，每間公司都各出奇謀，其中喺創業板上市嘅御藥堂（08185）就打出「藝人」牌，搵米雪同「三哥」苗僑偉嚟撐場，米雪仲同絲絲講，今次御藥堂上市都有送啲股份畀佢！
御藥堂代言人搶晒鏡
幫御藥堂做咗十年代言人嘅米雪話，好開心第一次做上市公司嘅代言人，仲透露御藥堂有送股份畀佢做禮物，不過幾多手佢就唔肯講喇！佢仲不忙幫代言公司賣廣告，話自己日日都有食佢啲保健品，仲有介紹畀朋友食。
佢仲同絲絲透露，御藥堂嚟緊將會推出兒童保健產品，所以Slogan都轉咗做「藥箱都變成玩具箱」咁話！米雪同「三哥」仲成為眾人焦點，唔少嘉賓爭住同佢哋影相！
至於主力生產氣霧劑產品嘅綠島，就特別搵咗一個本地畫家創作一幅名為《茉莉花香》嘅畫，送畀港交所做上市禮物。
綠島送畫 花香喻業務
茉莉花花期係五月至十月，正好配合綠島上市嘅時間，而且茉莉花亦可以提取成香精，係氣霧劑常用香氣之一；加上其花語係清純、質樸、玲瓏，寓意綠島務實嘅作風同行業精細化特色！