為免真正黑客搵到軟件嘅漏洞（Bug），微軟今年六月公布懸賞計劃，獎勵搵出佢哋軟件有咩Bug嘅電腦專家。微軟日前宣布，向揪出微軟Window 8.1一個嚴重安全Bug嘅黑客專家，頒發超過10萬美元（約78萬港元）嘅獎金，呢個Bug係真正Gold Bug（金甲蟲）。
呢位黑客專家叫James Forshaw，來自安全顧問公司Context Security，之不過微軟唔肯透露究竟Forshaw搵到咩天大嘅漏洞，值得微軟畀咁多獎金，話要等到微軟諗到解決辦法先再講。Forshaw之前亦因為發現微軟瀏覽器IE11試用版嘅幾個漏洞，又成功賺到一筆9,400美元獎金。
到依家為止，微軟一共向六位研究員發放共12.8萬美元獎金（約99.8萬港元），除咗Forshaw咁犀利一次過拎走其中10萬美元之外，其餘嘅研究員就得到500美元至5,500美元不等嘅獎金。有趣嘅係，原來其中兩位獲獎者係微軟對手Google嘅員工，佢哋仲捐晒啲獎金去慈善團體，直情當搵微軟錯處係做善事。
余詩韻