絲絲最鍾意睇番以前啲學生相，因為年少無知時影落嘅相先係最趣怪、最爆笑，而《Business Insider》就為大家搜羅咗27位著名金融名人嘅陳年高中學生相，一於將呢班投資界風雲人物「那些年」嘅青澀樣逐個捉！
高盛行政總裁布蘭克費恩喺布魯克林區長大，大家可能都聽過佢靠獎學金攻讀哈佛大學法學博士學位，最後輾轉成為高盛掌舵人嘅故事，不過好少人知佢仲係一名游泳健將，贏過400米自由泳城市冠軍，又係畢業典禮致謝辭嘅學生代表。
另一位高中時期都係學校小領袖嘅華爾街猛人，必定要數Paul Tudor Jones喇。Jones當年讀書唔單止成績好，仲係學生會副會長，佢依家就係一位出名嘅慈善家，一九八八年創辦嘅羅賓漢基金會，幫助紐約嘅窮人，唔知Jones熱心公益嘅性格，係咪由高中時期培養出嚟呢？
以沽空中國知名嘅錢隆斯（Jim Chanos），學生樣同依家都唔係差好遠，淨係冇咗副眼鏡，不過以前頭髮就多啲，唔似依家見到M字額。反而對沖基金Third Point嘅Daniel Loeb對比大啲，佢依家嗰樣就勁似型男佐治古尼，但睇番佢中學嗰樣，佢又似走鄰家小男孩嘅路線喎！
余詩韻