無紙化不再印實物
隨住電腦普及，好多上市公司一早已經進行「無紙化交易」，迪士尼係少數繼續堅持印製一張張實物股票嘅美國上市公司，但為咗節省發行成本同交易成本，迪士尼公司終決定追上大潮流，改行「無紙化交易」，呢張充滿迪士尼特色嘅實物股票好快就會成為絕版，變成迪士尼迷嘅集體回憶之餘，仲有可能會身價急升，搖身一變成為瘋炒對象。
迪士尼嘅實物股票上面印有好多家喻戶曉嘅卡通人物，好似米奇老鼠、小鹿斑比、小飛象、唐老鴨，喺實物股票市場上人氣極高，因為確實有唔少迪士尼迷只係想得到呢張紙留念，而走去買迪士尼嘅股票。絲絲聽聞好多家長仲會藉住呢張既實在又美觀嘅股票，教導小朋友投資股票嘅概念添。