絲絲講場：張炳強歌神上身唱名曲
唱歌係好多人嘅嗜好，唱得好嘅，就娛己娛人，英皇國際（00163）執行董事張炳強（Donald）原來都係唱得之人，尋日歌神上身，唱咗自己嘅首本名曲，即係前輩級歌手關正傑嘅名曲《萬水千山縱橫》，歌詞開頭幾句係「萬水千山縱橫，豈懼風急雨翻...」，唔知係咪想憑歌寄意，抒發對依家樓市嘅睇法！
英皇商場添新租戶
一向親民兼搞笑嘅Donald，邊唱邊叫同事幫佢拍低唱歌片段，笑住話畀老細品評下，有冇潛質去英皇娛樂發展，絲絲真係笑爆嘴。
佢唔係無端端發星夢，皆因旗下嘅灣仔英皇集團中心商場，最近引入咗五個新租戶，包括Neway卡拉OK，所以佢咪趁機試用新卡拉OK房嘅設施。近年灣仔區大興土木搞重建，唔少知名商戶都由街舖搬去商場。
租金升咗四至五成
今次新增嘅五個新租戶商戶租金，Donald話比之前升咗四至五成，個別呎租90至200元，租客包括有由天樂里街舖搬過嚟三及四樓兩層嘅Neway卡拉OK，同埋炭燒乳豬聞名嘅喜萬年酒樓等等。
余詩韻