美國聯儲局推出新嘅一百美元鈔票，今日開始於市面流通，較原定推出時間遲咗足足兩年半。新鈔與舊鈔最明顯嘅分別，係採用現代化同富色彩嘅防偽特徵，花咗咁多心機，一於睇吓呢張新鈔仲有咩咁特別啦。
新鈔除咗會繼續使用難以複製嘅紙質，新設計兩大亮點分別係一條藍色3D立體保險線，打側時會有圖像浮現，以及一個銅紅色嘅墨水印，打側時會轉變為綠色。
此外，新鈔會繼續印上美國開國元勳之一富蘭克林嘅人像，還會加入獨立宣言嘅節錄，從富蘭克林嘅左肩一直寫到鈔票的右邊，將新鈔置於光線下，右邊位置還會出現富蘭克林嘅水印。
新鈔開發時間超過十年，原本計劃一一年二月推出，但由於出現印刷等問題，結果押後到今時今日才正式面世。不過，唔講唔知，原來一百美元鈔票可以話係美國一大出口「產品」，據聯儲局估計，市面流通嘅一百美元鈔票中，有一半至三分之二被帶到海外，亦因此成為仿冒對象，難怪當局不惜工本設計新鈔。
余詩韻