中興通訊（00763）嘅智能手機喺內地有一定知名度，但拓展海外市場就梗係要喺品牌形象多下功夫嘞，所以中興通訊最近就同美國NBA球隊休斯敦火箭簽約，做咗火箭隊唯一指定嘅智能手機合作夥伴。
唔知今次合作可唔可以幫到中興手機喺美國嘅銷量，好似火箭咁飛升呢？
火箭隊喺NBA一向有好高嘅知名度，球迷認真唔少，中興通訊同火箭隊合作後，全球嘅球迷就可以睇到中興手機出現喺火箭隊主場嘅廣告板上。
依家中興手機喺美國嘅銷量排緊第四，僅次於三星、蘋果同埋LG，呢次同火箭隊合作可謂抱好大期望，雖然雙方無透露合作金額，但有傳聞指金額不菲o架！
中興梗係嗱嗱聲推廣產品，據講會喺美國推出兩款智能手機，都係品牌內比較高端嘅機款，公司喺北美嘅總經理就話，勢要喺美國市場做大咁話。
余詩韻