近年香港掀起一陣拉麵風，唔少日本拉麵過江龍襲港，見到個孖屐咁受落，做開中餐嘅稻香（00573）都唔輸蝕，同日本長崎拉麵店RingerHut合作，尋日就開咗首間分店。
唔好以為「又係豬骨拉麵，有咩咁特別呀」，呢間就正正係sell健康，賣田園風味嘅蔬菜拉麵。
稻香今次係首度進軍中式以外嘅餐飲業務，絲絲聽行政總裁梁耀進講，話要將品牌多元化發展，今次仲係標誌着進軍日本菜市場的里程碑添。
稻香、RingerHut將分別以51%及49%股權方式合作營運，之前聽聞會喺今年開兩間店，第一間就選址九龍灣淘大商場，每間店投資額約400萬元。
RingerHut係日本麵界龍頭之一，拉麵係以大量新鮮蔬菜、健康、營養為主打，同一般豬骨拉麵好唔同，湯底會較為清淡，一碗拉麵集合咗七種野菜，當然亦都有肉類同海鮮口味，拉麵價位較為大眾化，每碗麵售價介乎35至65元，食慣「重口味」嘅香港人可以Refresh一下啦！
余詩韻