近日牛津互聯網研究所（Oxford Internet Institute）公布咗全球各國最多人瀏覽嘅網站分布圖，結果Google同facebook（fb）跑贏其他網站一條街，百度喺中國嘅佔有率就最高，而日本就比較特別，因為最受歡迎嘅網站仍然係雅虎！
根據研究所數據，Google無論喺北美、歐洲、南美部分地區，定係南亞同東南亞，都係最熱門嘅網站。研究報告讚Google喺互聯網世界嘅龍頭地位無人能及，有超過10億戶，即係足足50%嘅互聯網人口都有瀏覽Google，旗下嘅Youtube經常位列第三位，影響力驚人！唔怪得Google嘅股價節節上升，最高去到924美元，目前股價872美元！而好似火箭咁崛起嘅fb，喺包括中東、北非及講西班牙話嘅南美等50個國家贏咗瀏覽量冠軍，目前股價有51美元！
喺亞洲情況就有些唔同啦，研究報告就話，雖然中國最成功嘅網站係百度，不過百度嘅成功中國政府都有功勞。
因為政府限制咗Google喺內地嘅發展，所以百度先可以控制中國80%搜索市場，近日百度重稱霸埋韓國市場添呀！而曾經盛極一時嘅雅虎，就只贏得日本市場咋！
余詩韻