期指觀瀾:反彈完成再開淡倉

大市成交唔夠,走勢陰陽怪氣在所難免,上周五港股唔肯跟美股跌,低開到最後跌幅收窄到75點,昨日當大家預備港股要跟上周五預託證券高開,期指大戶就決定同大家來一個反高潮。

期指昨日以23,166點全日高位開出後,未到十點已經做埋全日低位22,861點,開市無法達到預期高位23,200點,恒指及期指20日線分別在23,073點及23,086點,一樣係毫無支持可言。在A股無市,亞洲市大致平靜之下,一班好友死得不明不白。

昨日期指即市曾經反撲,但主動買盤唔算特別多,尤其23,013點又係即市高低位的0.5反彈阻力,好快已被淡友壓制,計埋夜期期指一連三日,受制於23,244至23,248點的阻力,短期未見成交增加下上破阻力,後市不能過分樂觀。

A股復市前夕,經過昨日一跌,恒指收市價已經低於上周三的22,984點,技術上已確認上周四、五的反彈告一段落,若跌穿22,790點及22,845點延伸頸線,短期後抽之後,跌勢有機會加快,昨日早市期指回得太快,未能把握高位做淡倉的機會,筆者在收市價以三分一注碼開淡倉,如果期指失守22,742點,估計今轉見22,500點樓下的機會相當大。

John Mullen