Market Insight：港股中線隨時轉弱

上周五美股回升，華爾街顯然坐定粒六認定最後同電視劇結局一樣，大團圓收場。最壞打算，如昨日所指，○八年九月個個以為美國會推總值7,000億美元向金融機構買入不良資產的方案，最後因為國會玩嘢，拖多幾日，結果美股V形走勢先急跌後急抽。點都好，依家大孖沙沽又唔係，買又怕太早，未來十日恐怕塘水滾塘魚形勢難免，散戶見隊得夠狠博吓反彈無妨，非必要仲係靠邊站好過。

上星期港股預託證券高收，不過美國債限死線倒數之中，昨日港股反高潮，開高15點，即全日高位23,152點開出後，很快倒跌，最低見過22,896點，收報22,973點跌164點，五個交易日在10日及20日線之間玩回力鏢，資金流顯示港股中線有轉弱的趨勢，短期內先回試22,580點（19,426至23,554點的0.236回吐）的機會增加。

古勝冇點你 201３/10/08

萬里長空

比亞迪趁機會發圍

有傳阿里巴巴集團趕唔到今年上市，昨日騰訊（00700）同雲遊（00484）高位有啲壓力，汽車股相當個別，吉利汽車（00175）逆市再升2%，對手美國Tesla有車在公路着火，公司急急發news letter畀粉絲解釋其安全性，比亞迪（01211）卻勢如破竹再升6%收報38.75元，引擎生產商新晨動力（01148）爆升6%收報3.5元，相信PE夠低係唯一原因。

昨見乳業股都有抖氣迹象，反而賺小朋友錢的，如好孩子國際（01086）、青蛙王子（01259）以及隆成集團（01225）接力炒上。今年，中國人口紅利成為歷史，為解決勞動人口老化，逐步放寬一孩政策事在必行，消息幾乎每幾星期攞出嚟炒一次。

炒概念之外，事實嬰兒用品市場在內地眾多產業中，少數被視為最可以抵抗經濟低速增長的烏托邦，今年上半年嬰兒用品市場比去年同期增加一成一，完全無懼經濟吹逆風。

好孩子仲有一浸炒

好孩子及隆成都係主攻嬰兒車生產，分別係美國市場最大的兩個生產商，好孩子定位走較大眾化路線，今年積極增加內地銷售，亦提高歐洲直銷比例，令毛利有較大改善。隆成產品則主打中高檔路線，歐美零售消費淡風影響較大，估值低可惜平日交投唔多，反而好孩子今年六月見2.61元低位後，級級上勢頭唔錯，昨日升到六月初4至4.3元阻力區，明年16.2倍PE。奶粉股已經紛紛去到癲價，退而求其次，睇落好孩子應該仲有一浸炒，成交配合有條件挑戰年初4.73元的近兩年高位。

古勝於周末接到N咁多個唔認識的電話號碼，均來自地產代理，講到唔買就笨咁滯。原來係新地（00016）劈價賣九龍站天璽181個貨尾單位，價單比年初推售平一成，計埋各類抵銷辣招的優惠，減幅達到四成，是特區政府推雙倍印花稅（DSD）之後，發展商之中減得最狠一次。收到價單，見部分價格仲要比早輪銀主拍賣價仲要低，新地接受現實帶頭減價出貨。

減價有助樓市交投

今次提供優惠主要補貼準買家DSD七成，以抵銷辣招辣度，事實近幾個月所見，豪宅投資客及內地買家幾乎絕迹於九龍站，加埋早輪在上海徐家匯投地準備豪擲400億元，今次劈價，證實新地發展重心由香港轉去內地的大趨勢。君可見，今年幾幅官地成交價低處未算低，政府辣招使樓市需求急降，發展商買地已計算更大風險溢價。

其他發展商會唔會跟住劈，會係事件關鍵，對近日搵單生意都難的地產代理，如果發展商及二手業主都接受現實，樓市交投或者有番多少起色，美聯集團（01200）就有機炒番轉。

古勝