早前娃哈哈集團董事長宗慶后遇襲，畀人斬傷手指。原來佢遇襲嘅時候身邊竟然冇保鏢！絲絲問內地朋友先知，內地富豪唔興請保鏢，只有「特別需要」保護嘅富豪先會請保鏢保護自己！
原來喺一○年之前，喺內地保鏢仍然都係非法行業，直至實施《保安服務管理條例》之後，貼身保鏢先至合法。所以呢一行仍然喺起步階段，大約有1,000萬人從事安保行業，行業總值超過400億人民幣。不過大部分都係屬於保安，而唔係私人保鏢。
其實私人保鏢呢一行，喺外國同香港都好流行！唔單止有錢人，就連明星出街都會有保鏢喺身邊。但宗慶后身為中國前首富，竟然冇保鏢保護自己？絲絲聽講，原來內地好多富豪都覺得，只要「做人清白，冇得罪人」就唔會遇襲，只有一啲欠「大耳窿」錢嘅富豪，先會請保鏢「特別保護」自己呀！
絲絲覺得，富豪請多個人嚟保護自己好平常，唔知經過「宗慶后遇襲」一事之後，富豪界會唔會掀起一股爭聘保鏢潮呢？