極具人氣嘅即時通訊軟件LINE，持續拓展本港市場，家陣就連渣打香港、海洋公園等大型本港機構，都開始同LINE大玩Crossover推廣業務，既然咁成功，合作關係最密切嘅流動服務供應商，當然唔會無份。絲絲收到風，和電香港（00215）旗下3香港今日就會宣布同LINE開展服務合作，LINE仲搶先喺軟件披露，申請呢項新服務計劃，會有免費嘅IM貼圖公布下載！
對於呢個新服務計劃，3香港老友同絲絲講，具體詳情要到今日先會公布。作為和電香港主要合作夥伴之一嘅NTT DoCoMo亦會來港參與合作計劃嘅公布。
據LINE喺「貼圖小舖」發出嘅推廣訊息，今次佢哋其實係要推出3HKxLINE嘅數據服務組合，用戶數據服務合約期內可免費使用指定嘅IM貼圖。雖然服務計劃仍有待揭盅，不過從3香港之前同WhatsApp合推WhatsApp應用嘅數據及漫遊優惠嚟睇，今次同LINE合推嘅服務計劃相信類似。
而喺本港流動數據市場，傾向引入分級收費模式嘅趨勢下，今次同LINE嘅合作相信可吸引來LINE嘅粉絲支持，而對希望進一步鞏固本港市場地位嘅LINE來說，亦可謂帶來多贏局面。