如果講到最能夠代表一間公司嘅事物，絲絲一定會話係公司嘅Logo喇。好似之前Yahoo轉咗新Logo，成間公司嘅形象都跟住變得清爽。最近唔少公司都照辦煮碗，好似中國移動（00941）就靜雞雞推出新Logo，希望藉此為公司形象增添一啲活力；而Google創辦人兼CEO佩奇就話公司想換Logo之餘，仲要玩玩新意思，要加入天氣元素咁話。
雖然中國移動只係好低調咁喺二○一三通信展嘅攤位換上新Logo，但負責設計嘅北京正版公司就證實咗真有其事喇。
絲絲比較過新舊Logo，發現有好多細節改變咗，最明顯就係Logo顏色由全藍色變成中間綠色，相信係代表公司節能、環保嘅發展方針。至於字體方面，佢哋嘅中文名由「中國移動通信」精簡成「中國移動」，而英文字唔再全部用晒大階，改為第一個字母先用。設計公司解釋咁樣會令新Logo睇落簡潔啲，而且新標誌無咗圓形嘅外框，可以令到消費者目光更聚焦。
另外，之前Yahoo為咗揀合適Logo，就試過30日換足30個Logo。
搞到Google嘅佩奇見到「行家」換得咁開心，亦刺激佢想幫Google換Logo嘅想法，佢更加希望新設計可以做到本地化同實時化，能夠有天氣報告嘅功能。
原來佩奇細個喺密歇根州長大，嗰度經常出現暴風雪，發生過唔少意外，所以佢就希望將來Google嘅標誌可以顯示埋天氣資訊，提醒大家注意天氣狀況。
余詩韻