新iPhone銷售好過預期，蘋果公司股價大反撲，再一次說明要搵大茶飯，一定要從原始資料入手，而不能貪方便用已經過濾了的資料。戰友用個幾鐘頭時間細心睇Tim Cook的推介片段，當然是值回票價。
所以自己對研究報告以至市面專家推介，一向都甚少參考，以免影響自己的判斷，就算要看，也應該先有一個睇法之後才去看，減少人云亦云的機會。當然假如理解對象的功力甚高，極具價值的話，就作別論，正如今次蘋果公司也是抄功課而已。
捉中這個反彈浪，也不易賺大錢，蘋果公司今時今日爆發力和facebook已經有一大段距離，所以自己心目中的目標價，只是稍為升破今次未跌之前股價原有的水平，即是可能大約520美元左右，潛在升幅預期不多，買Call時便有些顧忌，特別是不想買遠期Call，結果全數押注九月末日Call及十月Call，槓桿大爆發力夠，壞處是時間值耗損快，持倉心理壓力大。
由於挾淡倉的關係，第一輪升勢肯定是最快最勁，因此周一晚已急急腳在開市初段沽清所有Call，只剩餘正股，當日中後段股價果然回軟，Call期權金跌得甚快，證明撤退的決定正確。
問題是最終目標價不止於此，就此了結的話，又是將一鋪靚牌三番就食胡。既可以鎖定利潤而同時保留攻擊力的方法，是轉買十月行使價較高的Call，博正股繼續升，而且就算升勢回復正常，循序漸進也不是大問題，反正也不過是將利潤繼續過關而已。
要用期權贏超級多錢，一定要揀中一些潛在升幅或者跌幅夠勁的股票，買較遠期期權，才夠膽慢慢坐到發達，末日Call Put爆發力夠，兼且速戰速決，但太容易輸清光，投入的注碼往往不敢太多，很可能落入於大大聲細細注的投機項目而已。
豐盛金融資產管理董事 黃國英（作者為註冊持牌人士，公司客戶持有蘋果公司、facebook正股及認購期權）