胡潤研究院早前已列出中國首富排名榜，萬達集團董事長王健林，撼贏娃哈哈董事長宗慶后，成為首富，而尋日公布嘅「房地產富豪榜」，王健林既然係首富，自然做埋地產界富豪嘅No.1，佢嘅身家大約係1,010億元人民幣。而舊年仲排喺第五位嘅楊惠妍，今年唔單只做咗女首富，喺房地產富豪榜名次大躍進，以425億人仔跳升去到第二位。
內地樓價無懼調控愈升愈有，地產業富豪身家都暴漲咗唔少，今年嘅「胡潤房地產富豪榜」，地產富豪嘅上榜門檻同平均財富都打破咗歷史紀錄，上榜門檻比舊年提高咗兩成五，最低要求要75億人仔，而頭50名富豪嘅平均財富比起舊年都升咗超過兩成二，達到157億元人民幣。
王健林喺最近四年入面已經係第三次名列房地產榜首富，根據胡潤統計，地產佔咗佢個人財富嘅八成。不過，近年萬達業務向多元化發展，繼舊年用26億美元收購美國電影院線AMC之後，王健林前幾年先再向荷李活宣戰，話會斥資500億元人民幣，喺青島修建世界最大嘅影視基地同度假城「東方影都」。