Market Insight:網絡商前景有轉機

隔晚美股偏軟,道指跌49點報15,401點,儘管再無新利淡消息,十年美債息由早前高位接近3厘回到2.7厘,但華爾街仲喺畀「十月可能退市」的預期困擾。唔講唔知,有個統計話一年52個星期中,傳統上,標普500指數全年表現最差就係今個禮拜。

上周五是美股九月份三期結算(指數期貨、期權及股票期權),自○一年至今紀錄是九跌兩升,平均跌幅1.89%,到底點解會有咁現象,古勝都無辦法解釋,惟有信住佢先。

以為九月期指未平倉合約臨埋單發力,上周五升至11萬張,斷估本周結算,將淡友趕盡殺絕的機會高唱入雲。殊不知港股一連兩日反高潮,昨日恒指連10日線都一度失守,收市跌192點報23,179點。值得注意,左右大局嘅幾隻重磅股,騰訊(00700)、滙控(00005)、中移(00941)、中海油(00883)及中石油(00857)均跌穿10日線,八月底開始挾倉潮,可能告一段落。

輝山乳業生得逢時

有傳國家預備大灑銀彈扶持內地乳業,半隻國企的蒙牛乳業(02319)創完歷史新高後偏軟,昨倒跌0.5%收報35.45元,似乎要抖一抖氣。資金轉而炒奶粉股,可惜雅士利(01230)仍未復牌,向來炒味濃的合生元(01112)炒上59.2元創歷史新高,收市仍升5.3%報59.05元。

昨日法巴加入唱好,睇好合生元「媽媽100」網分銷平台,認為潛在併購及新產品即將推出,都為股價及業績提供上升空間,目標價由53.5元大幅調高到70.5元,算係外資行中唱得最好一間。雖然本周掛牌的輝山乳業(06863),並不在傳聞中國策扶持名單內,但配售部分反應熱鬧,據聞大行內暗盤叫緊2.75元樓上先有沽盤,入咗飛應該可以安心等派彩。

近兩星期,聯儲局主席伯南克彈弓手,話退又唔退之外,古勝覺得最爆冷都算蘋果公司新作,iPhone 5s及5c的銷情。隔晚官方公布,開售三日累積賣掉900萬部,破咗iPhone紀錄,班果粉一面鬧金色俗氣、設計無新意、屏幕太細,一面仲要掏腰包,死未!

新iPhone爆出驚喜

有份代工的富智康(02038)昨升3.3%報4.88元,而主打智能手機鏡頭的舜宇光學(02382)剛以先舊後新配股,每股作價8.06元,聽到唔少芬佬話較周一收市價折讓4.4%太少,嫌佢貴,結果開出穿一穿批股價最後收報8.13元,算有交代。

講開iPhone,兩間有份分銷的本地網絡商,和電香港(00215)及數碼通(00315)都趁iPhone跟機月費計劃中,取消無限數據。分析員認為對兩間公司的客戶平均消費有拉動作用,但相信效果需要較長時間浮現(兩年合約續期的客戶,短期可能會先揀2GB以下的月費計劃慳錢),可能亦因為咁,昨日和電股價無起跌,數碼通則有0.7%進帳報10.62元。

數碼通早前公布全年業績,意外地減派息,畀唔少捧場客及芬佬鬧爆。據知管理層無向分析員提供滿意解釋,點解唔等錢使之下突然將派息比率降低。坊間的陰謀論,認為主要是早前幾間電訊公司,同特區政府一六年堅持強行收回三分一3G頻譜,再攞出嚟拍賣鬧得僵有關,故出來擺擺姿態!

周息率仍具吸引力

係真係假,只有當事人至知,姑勿論點,數碼通同因為業績唔及預期的和電,短短兩個月之內先後被基金清洗,短期要彈番上去業績前水平真係唔易,但近日因為美國退市步伐可能比預期慢得多,美債息高位有見頂迹象,房託基金一類的高息資產開始見支持。

兩隻電訊股取消無限數據月費計劃,變相加價,應該再跌空間十分有限,正係股神巴菲特所指的「雪茄屁股」投資法。睇番和電同數碼通一四年預期派息率,其實都唔錯,分別係6.05厘及5.97厘。當然,兩者之間,在下仲係傾向和電多少少。

古勝