澳元近期回落咗唔少，但好多人仍然話貴，大有下跌空間。澳洲證券公司CommSec出咗份報告，攞咗《經濟學人》巨無霸指數嘅購買力平價（PPP）概念，用一部16G、配備WiFi同Retina顯示屏嘅iPad喺全球各地售價，睇下澳元匯價是否合理，結果令好多人出乎意料。
CommSec早喺○七年就編製出iPod指數，依家與時並進，以大熱嘅iPad嚟分析匯價水平。
報告發現，阿根廷係全球買iPad最貴嘅地方，每部索價高達1,094美元，拋離賣得最平、售價只係473美元嘅馬來西亞一倍有多，澳洲則賣507美元，榜內第六低，略高過美國嘅499美元。
報告認為，美國同澳洲嘅iPad售價相若，以現時每一澳元兌換94美仙計，顯示澳元被低估，同澳洲央行一直埋怨澳元高企損害當地競爭力嘅講法，明顯背道而馳。
同樣地，iPad喺中國要賣603美元，較美國多約兩成，顯示人民幣被高估，咁同一般認為人民幣將穩定升值嘅睇法亦有好大出入。至於香港iPad賣502美元係全球第四低，同美國售價差唔多。