兒時課本常形容月亮皎潔，呢個中秋絲絲終於見識到，乜嘢為之皎潔嘅月亮。由迎月到追月，個月亮靚到暈，絲絲估，大部分地方都可以欣賞到月亮嘅美態，咁淘寶保險喺中秋節前推出嘅「賞月保險」，咪發咗個「中秋財」？
「賞月保險」嘅玩法係，只要你喺中秋當晚因為天氣關係而睇唔到月亮就有得賠。
根據中秋正日嘅夜晚八點至追月嗰日凌晨兩點嘅天氣報告，喺「賞月險」包括嘅41個城市入面，只有西安、成都、溫州、大連等9個城市係屬於陰雨天氣，亦即係只有喺呢9個城市買咗「賞月險」嘅網友，先可獲得188元（人民幣˙下同）嘅賠償，其餘32個城市一律冇得賠呀！
全中國一共有5,154人買咗「賞月險」，但其中得9%嘅買家獲賠償，推出保險嘅安聯財險發咗個小小嘅「中秋財」！
可能大家都估到中秋節嘅天氣唔錯，所以就只有5,154人買咗保險，安聯財險收到嘅保費有40萬元，而今次嘅賠償金額只係8.7萬元，帳面計落安聯財險已經賺咗32萬元！呢款保險喺內地惹起好大爭議，有人關心當中涉及嘅風險，擔心盲目追求新花樣，將保險嘅真正意義混淆，可能埋下風險炸彈呢。
余詩韻