Market Insight：副食品股蠢蠢欲動

連串內地經濟數據比預期理想，瑞銀把中國第三季GDP預測，由7.5%調高至7.7%，睇埋美銀美林、花旗及德銀幾間大行，最近都分別調高到7.9%、7.8%及7.9%，較對上一次預測提升幅度介乎0.2至0.4%，中央全年保住7.5%個「底」，問題應該唔大，反而中國經濟由驚到死地會硬着陸，港股自六月最低點19,426點，輾轉返回上星期23,554點高位，足足升咗21.2%，利好因素短期有可能反映得八八九九。

上周講過，來自不同基金消息來源，都話本月首兩三個星期，內地數據唔及七、八月般強勁，數據到十月中至曝光，但小心挾淡倉潮，玩埋九月底十月初，大戶隨時掉番轉頭嚟玩。

古勝冇點你

萬里長空

果汁股向來欠吸引

內地傳媒指三間香港上市內地果汁股，匯源（01886）、安德利（02218）及海升（00359）都有從果農收集變質變壞，或者未成熟就掉落的「瞎果」，製作果汁及濃縮果汁。報道一曝光，雖然立即否認，匯源昨仍跌4.9%報4.22元，安德利仲未復牌免得一跌，海升則原地踏步。

報道提到由果農買「爛生果」之後用消毒劑沖洗之後直接榨汁，就算真有其事，其實都唔會太令人吃驚，俗語話眼不見為乾淨，就算先進如美國，今日大部分漢堡扒及腸仔等都由起肉後剩餘物資，再用離心機剝離經殺菌劑清洗的「人造肉食」，核突過爛生果榨汁多多聲。三隻果汁股論盈利能力，真係無乜投資價值，都只能偶然靠收購消息，燒一燒冷灶。

講過隻天喔國際（01219）收乾晒等開車，睇嚟去到3.4元樓下承接力唔錯。研究天喔期間，見幾隻副食品股近期都蠢蠢欲動，康師傅（00322）由上個月18.3元一度升上22元，統一企業（00220）由上月底6.6元去番昨日的7.98元。

蠟筆小新不妨冷敲

雖然中期業績之後唔少分析員睇淡，話內地方便麵價格戰仲會持續一段日子，之不過，康師傅及統一始終今年累積唔少跌幅，加埋原材料好似棕櫚油及PET膠粒等，第三、四季價格可望平穩，毛利率應至少維持上半年水平。而中期業績一枝獨秀的中國旺旺（00151），更加唔使講，股價從上月低位10.1元彈番上12.46元，差些少去到12.52元歷史高位。

論到估值最平，要數埋冷門的蠟筆小新食品（01262），產品有點像旺旺，除果凍外，有棒棒糖、奶糖、軟糖及朱古力及甜食，以及豆腐乾及烘培等小食，半年業績對辦，賺1.87億元人仔升16.1%，第二季開始推出乳製飲品提供額外貢獻所致，假設全年維持同等升幅，盈利3.22億人仔，以45億元市值，市盈率僅11倍，約為旺旺30倍PE的三分之一。

不過，平還平，當然不是全無缺點，市值低於10億美元，或許一些有投資限制的基金卻步，其次，淨現金下，年初還申請一項7,500萬美元融資，若不是有重大投資，似有博人仔升值之嫌。不過，偏低估值也反映一定風險溢價，在內地食品股升浪中，似有值得小注一試的條件。

電子股板塊見異動

雖然昨日得半日市，且恒指低收，但未影響炒作氣氛，乳品股表現突出，而在電子股板塊，則出現兩個較冷門的名字，就是長城科技（00074）同熊貓電子（00553），兩者均名列主板廿大升幅榜，升幅分別為11.9%及8.9%，成交都唔細，分別有805萬股及763萬股。

找尋原因，昨日A股市場，電子、通訊設備及服務、互聯網科技等股份成升市領頭羊，會唔會有北水在「十‧一」長假前來港炒起埋同類股，不得而知，但見到昨日連龍頭電訊設備股中興通訊（00763）都好似靜極思動，短線不妨循呢個方向尋找異動股。

古勝