福布斯美國四百大富豪排行榜出咗爐，微軟創辦人蓋茨、「股神」巴菲特繼續「冧莊」做冠、亞軍，呢個排名冇乜新意，所以公布後市場都冇乜人講，點知原來有火花，素有「石油大王」之稱嘅皮肯斯唔忿氣畀人踢出榜，仲話計少咗佢啲身家，唔怪之得嬲爆爆啦。
佢喺○五年開始一直打入富豪榜，今次就例外，福布斯話佢身家由高峰期嘅20億美元，縮水過半得返9.5億美元。
體育頻道ESPN分析員Darren Rovell前晚加入抽水大軍，喺Twitter特登tag埋皮肯斯個名，通街唱佢再唔係「billionaire」，一生見慣風浪嘅「石油大王」，好有禮貌咁喺返Twitter覆佢，9.5億美元好夠佢老人家搣，叫佢一於少憂，仲好豁達咁話「我捐出去嘅錢都多過呢個數啦！」
查實皮肯斯呢次失威，皆因佢近幾年搏命大搞嘅風力發電「蝕到甩褲」。話說佢五年前發起「皮肯斯計劃」，重頭戲係發展一個全球最大嘅風力發電場，最終希望做到減少依賴進口能源嘅目標。
余詩韻