絲絲講場：現牧高麗娜難捨老拍檔
合作做生意唔易，好多人都會鬧不和，不過絲絲相信現代牧業（01117）就例外，因為兩個創辦人鄧九強同高麗娜一直合作無間，舊年鄧九強就無做，當時接替主席係華裕能，佢話鄧九強係基於身體健康而辭任，而好拍檔高麗娜就有啲失落。
現代牧業由鄧九強同高麗娜一手創辦，○五年成立至今，短短八年做到大型規模化牧場、兼且喺香港掛牌上市，仲同蒙牛（02319）有緊密關係，其實都唔簡單，不過鄧九強舊年九月突然辭任，接連今年五月畀兩個基金股東賣股畀蒙牛，惹嚟大家賣盤嘅猜疑。
遵循鄧九強路線
創辦人之中，只有高麗娜留低，對於近一年公司管理層、以至股東轉變，佢同絲絲講，其實KKR同蒙牛，只係股東身份嘅互換，反而之前合作多年嘅拍檔鄧九強辭任，佢就「有一點點失落」。
咁又係，話晒咁多年一齊打拚，努力湊大個仔，肯定有番咁上下感情啦，唔怪得佢仲話「很難割捨，但也得面對事實」啦，依家創始人雖然得番佢，但佢強調「公司的思路、方向仍按鄧主席原來既定嘅方向走，不會改變。」
余詩韻