雷曼兄弟五年前突然爆煲，觸發金融海嘯，亦都搞到好多投資者輸到走佬咁滯，不過一班幫雷曼爆煲執手尾，管理破產嘅律師同會計師可能會企埋一邊偷笑，因為呢次「雷曼事件」就帶挈佢哋賺到一筆高達30億美元（約234億港元）嘅「災難財」。
雷曼作為一間跨國投行，規模咁大，所以自從佢申請破產保護，就引發一連串複雜嘅跨國訴訟，雷曼首席破產顧問仲話，短短幾日內，就已經有八十幾宗針對雷曼嘅破產訴訟啦。
律師接Job接到唔停手，律師費自然相當可觀啦，呢筆30億美元嘅律師費，仲多過雷曼倒閉前幾年嘅年利潤，認真誇張﹗
絲絲睇返法院文件，位於紐約嘅雷曼公司就支付咗廿幾億美元嘅律師費用，至於雷曼公司歐洲分部，截到今年三月，都雙手奉上十億美元畀一班律師，差唔多佔2.3%雷曼計劃償還畀債權人嘅金額。
余詩韻