絲絲講場：巴拉跳槽小米密斟一年
Google前Android業務副總裁巴拉（Hugo Barra），呢排超紅，唔單止因為佢「過檔」去小米做副總裁，成為小米第一個擔任重要崗位嘅外國人，更重要嘅係佢嘅感情生活，前女友搭上Google創辦人布林。巴拉話同Google再見亦是朋友，但係同布林仲係咪朋友呢？
巴拉之前掌管Google全球Android產品業務，紅過炸子雞，忽然過檔，科網Blogger爆料話佢嘅前女友，成功俘虜身家高達228億美元嘅Google老闆布林，仲係布林同老婆分開嘅原因添。呢位港產混血美女同巴拉，加埋布林及老婆，呢段四角關係，好睇過電視劇。
外界有傳話巴拉離開係因為感情問題，不過佢淨係承認喺Google做得唔開心，又強調過檔小米手機嘅決定絕對唔係一朝一夕，兩者已經傾咗超過一年時間。
堅持無關感情問題
巴拉仲話，自己加入Google嘅第二日，就認識當時仲喺Google工作嘅林斌。之後林斌「另起爐灶」創立小米，巴拉曾經帶過小米電話返Google畀同事睇。舊年林斌搵巴拉過檔，巴拉覺得呢個係一生只有一次嘅機會，事關從頭開始打造一間可能會同Google齊名嘅公司，係佢嘅夢想呀！
聽講巴拉喺跳槽前已經同Google傾過，小米係Google最重要嘅合作夥伴，Google覺得喺小米入面有個自己人都係件好事，所以佢先決定離開，講到尾都係話同感情問題冇關。
余詩韻