內地邊個女人最有錢？或者可以睇吓《2013胡潤女富豪榜》，一向低調嘅碧桂園（02007）創辦人楊國強千金楊惠妍，相隔五年再次榮登榜首，今年三十二歲嘅佢，已經有510億元人民幣財富，力壓舊年居榜首嘅龍湖地產（00960）董事長吳亞軍，原因何解？
吳亞軍同丈夫蔡奎舊年證實離婚，原本兩人喺龍湖合共嘅七成股權，既然要分莊，吳亞軍嘅身家梗係少減一截，撞啱龍湖今年嘅股價亦大幅滑落咗近14%，身家又要再縮啦。至於楊惠妍，佢依家揸住碧桂園逾半股權，而且隻股今年仲好聽使，升咗超過25%，楊惠妍身家自然水漲船高啦。喺此消彼長之下，吳亞軍中國女首富之名就惟有拱手讓比楊惠妍喇。
雖然兩人身家變幅各走極端，但睇番女富豪榜，從事房地產嘅人數最多，佔25%；金融與投資，佔18%；富豪之中比較少從事製造業，僅佔9%。而今次女富豪榜上榜門檻為36億元，比去年上升28.5%，是歷年最高，大家話中國係咪遍地富戶？
值得一提嘅係，楊惠妍有米得嚟好善心，佢喺《2013胡潤慈善榜》中，過去一年捐1.1億元人民幣，成為女富豪榜中的首善。
余詩韻