Market Insight：資產泡沫愈吹愈脹

其實，更加要小心的反而係十月底，美國國債預期會觸及16.7萬億美元上限。如果國會唔隻眼開隻眼閉，又再臨時審批提高上限，美國政府舉債危機，隨時影響環球股市。周身債，解決方法來來去去都係開源（加稅）或者節流（削減公共開支），兩者都難免令經濟復甦減慢。

國債上限又殺埋身

近幾個月，美債息顯著回升，長遠也帶來更龐大國債利息支出，美國能否完全退出量化寬鬆計劃，古勝甚是懷疑，目前趨勢，最有利係維持低匯價政策，加埋超低息配合，近日一眾主要外幣兌美元齊齊轉強，同美國經濟周期比歐亞更早見底，聯儲局最先退市的預期背馳，已道出匯商已經開始為十月國債上限問題做好部署。

近日聽到，唔少人預期美國退市加埋香港政府辣招，本地樓價兩年要跌五成。古勝親身見證過兩次樓災，印象中，樓市同股市最大共通點，往往係通街睇淡時往往難以暴瀉，準買家愈審慎，樓價大跌風險反而比較細。

古勝冇點你 2013/09/18

萬里長空

查實磚頭價格急升，近年並非香港特產，美國、英國、日本、新加坡到馬來西亞，近年樓價都升得好誇張。香港奇怪之處在於鍾意為樓市升浪，代入一個奸角，曾經有人認為高樓價問題源於炒家，政府針對性地推SSD及BSD措施，限制出出入入的投機買賣，結果樓價唔跌，跟住又有人話，內地豪客是推高樓價的元兇，雙倍印花稅DSD應運而生，即使辣上加辣，樓價亦只係升勢減慢，講到底問題在於供應不足，以及回歸後多了有條件來港定居及投資的內地人。

天喔短線仲有得去

宏觀環境，美國量寬令平錢通街都係，如果古勝估計無錯的話，全球大債仔美國短期內都好難改到「以債養債」的惡習，甚至加埋匯價貶值及超低息三合一，全球資產泡沫只會愈吹愈脹，難以收拾。除非特區政府夠膽調整7.8這個數字，則另作別論。

本地銀行股因為永亨銀行（00302）可能賣盤急升，加埋早前創興銀行（01111）表示獲買家洽購，估唔到突然之間，咁多買家對香港一紙銀行牌照動心，街外仲傳到話會見到2.4至2.9倍市帳率。以香港銀行業高度競爭及瘋狂的出價，話潛在買家唔係阿爺的公司，用嘅係國家錢，真係講都無人信，古勝惟有恭喜揸到永亨及創興的投資者。

之前曾經提過隻零食股天喔國際（01219），基金配售部分僧多粥少的關係，昨日股價表現果然似模似樣，收報3.67元，比招股價3.15元炒高16.5%，發5億股新股，2.27億未上市先被基礎股東認頭，昨日有3.18億股易手，估計街貨已經收得好乾，長揸信心一般，但短期睇落似乎仲有相當水位可以炒上。

早前備受負面消息困擾的醫藥股，呢兩日又好似生猛番啲，如同仁堂科技（01666）昨日升3%、復星醫藥（02196）升3.9%、威高股份（01066）升4.1%、四環醫藥（00460）升2%。看來，相關股份已消化內地醫藥業打貪的消息，股價反彈說明長錢未有因此而離棄呢個板塊。

醫藥行業必須改革

但行業長遠要健康發展，改革是無可避免，藥企必須做好把關工作，在拓展業務的同時亦要做好內部風險管理，投資者在選股時也別只顧醫藥股的收入及盈利增長，宜特別留意應收帳款及帳期、存貨、經營現金流以及公司銷售的模式。

古勝