近年興起微電影，有唔少Target後生仔市場嘅公司，都開始用呢個途徑做宣傳，稻香（00573）今年就睇中呢個Concept，加埋女人愛包包嘅「橋」Sell月餅，一於用Online Platform宣傳，聽聞呢個包包都畀人搶購添呀！
月餅市場係各大餅店、食肆必爭之地，不過要喺芸芸競爭對手之中突圍而出，總要有啲諗頭先掂。其實稻香往年都比較少賣廣告，通常都係設計一啲特色Poster，吸引食客，今年就更加創新，拍咗套微電影，再加上改用可循環再用嘅袋嚟裝住啲月餅，仲有幾個顏色任君選擇，絲絲聽聞呢個黑色款畀人搶購晒喇，而且喺香港稻香先有得賣，有內地嘅稻香粉絲大嘆無份，呢個袋個成本都唔平，成十幾蚊個o架。
講開月餅，近年奶皇月餅極受市場追捧，原來稻香旗下泰昌推出嘅奶皇月餅亦都已經賣清光。稻香行政總裁梁耀進就話，今年整體月餅銷情按年增加三成。
不過梁耀進好坦白咁講，今年營運情況自○七年上市以來最大挑戰，但就唔會加價。
絲絲最期待喺佢哋嚟緊十月中會開日式拉麵店、十月至十一月又開泰昌Cafe，仲有下半年重點推廣嘅雞煲。
余詩韻