絲絲講場：花旗林鈺華畀囝囡查數
所謂三歲定八十，向小朋友灌輸理財知識好重要，自稱好民主嘅花旗銀行環球個人銀行服務香港區總經理林鈺華（Christine），喺呢方面好有自己嘅一套，有理論兼有實際，令三位寶貝囝囡從小學習理財。
利是存銀行睇月結單
有三個小朋友嘅Christine自稱係好民主嘅媽媽，雖然佢會將囝囝囡囡嘅利是錢全部存入銀行戶口，但就會每個月將銀行嘅月結單畀囝囡過目，證明啲錢真係幫佢哋儲緊o架！仲會畀小朋友提取其中嘅15%嚟買心頭好添，話要畀啲驚喜佢哋咁話喎。
話劇教導小學生理財
佢仲話，唔好以為錢銀嘅事，同小朋友無關，其實喺日常生活，簡單如買個早餐，都可以教育下一代正確理財態度。花旗香港同保良局合作，推出全新一套「Agent Penny與Will Power」漫畫同話劇，教導小學生理財，今年第一場話劇已經舉行咗，Christine趁機同大家分享點樣教小朋友理財。依家香港嘅打工仔女成日都話儲唔到錢，咁就證明理財真係並非「小兒科」嚟啦！
余詩韻