尋日網絡有段頗為耀眼嘅消息，「公安進駐珠海格力電器」，絲絲真係嚇咗一跳，以為出咗事，實情係喜事至真，因為佢哋請咗被譽為廣州公安系統「新星」陳偉才，出任公司副總裁，委任已經得到董事會通過。
陳偉才上月底發咗短信畀各方好友，話格力電器邀請佢加盟，所以辭去奮鬥咗廿年嘅公安崗位。
點解佢被譽為公安系統「新星」？原來有幾件具爭議性嘅事件同佢有關係。喺一○年，針對手機短信詐騙犯罪日趨嚴重嘅現象，陳偉才提出「實行手機實名制，預防和打擊手機短信詐騙」嘅議案，從源頭治理不良信息和手機短信詐騙犯罪。呢個月一號起，手機實名制已開始喺全國範圍推行。