Market Insight：航運股係時候發威

有時真係覺得基金經理同散戶分別唔大，好多時一兩個經濟消息加埋個市單邊行足幾日，睇法可以話變就變。事實上，今年八月底對沖基金平均賺4%，真係唔算特別標青，散戶如果無瞓落高息及防守股，或者買中一兩隻網股及電訊設備股，今年表現隨時叻過芬佬。

隔晚道指升96點收報14,930點，帶動昨日港股升271點報22,597點。睇今浪指數成分股表現，的確好過中型及二三線股幾條街，整體大市昨升跌股份比例57對43，同指數升幅唔多配合，短短幾日，由低位挾番千二點上嚟，或者好多人想問挾倉挾到幾時？

睇好陣營不斷擴大

通常挾倉唔係挾到有人信先停，就係淡友紛紛投降出現終極一升，幾時見好難講。值得一提，昨日個市主板成交651億元，如果剔除周三建行（00939）配股因素，係八月十六日以來最多，沽空佔大市成交比例9.07%，亦係八月中以來最低，反映唔多唔少已經愈來愈多投資者站在睇好的一方，刻下如果期指未平倉合約數目由近日9.8萬張水平明顯回落，看官們就要小心。

過去四十八小時，三星、索尼及小米齊齊趕在蘋果公司之先，發布下半年旗艦智能手機，九月十日輪到蘋果公司，估計公布新一代iPhone 5S及5C，智能手機的泥漿摔角即將展開，以往蘋果公司新機，首推往往無預中國，形成先達iPhone交易量，隨時勁過蘋果專賣店。今次情況有啲唔同，公司出埋中文邀請，九月十一日內地同步發布。

中海發展有力再上

路邊社消息各有各傳，一陣話中電信（00728）會獨家代售，一陣又話中移（00941）TD網兼用，總之捧場客各有各說法。早幾日網上見到，影到某北美大型連鎖超市價錢牌，顯示主攻中國等新興市場的iPhone 5C賣449美元，計落成2,800元人仔，可能貴過自稱硬件最強的小米3近800元人仔，依家中興通訊（00763）及聯想（00992）同級產品亦唔使咁貴，睇落5C的效應最終可能心理作用大於實際。

講番股份，隔晚波羅的海乾散貨指數大升4%，返回1,215點，環球貿易見底復甦成為市上其中一個當炒概念，航運股衰咗咁耐，炒上值博率其實唔低。中海發展（01138）上半年蝕9.23億元人仔，大行較樂觀的估計，明年最叻都係微蝕至收支平衡之間。

不過，股票買將來而非過去，儘管近排股價由3元低位爬番上嚟，但年初至今仲係跌緊2.5%，以市帳率計得0.46倍，比○八年金融海嘯最惡劣時期的0.62倍相比，仲低出兩成六，買佢純粹一個殘字，昨日股價啱啱破位，如果中國未來兩個月出口數據唔太離譜，股價挑戰年初高位5.28元應該唔過分。

個別軟件股見走樣

昨日軟件股呈個別發展，金山軟件（03888）再創新高，見18.38元，收報18.16元，上升3.7%；但中軟國際（00354）跌0.4%，收報2.37元；金蝶國際（00268）就更離奇，大成交質到落低位2.15元，收報2.16元，跌幅8.4%，成交1.37億元，幅走勢圖極之難睇！

到底是否有利淡消息跟尾，古勝不得而知，但其實強勢股如金山軟件，升勢都係靠憧憬與小米合作，先至有咁強勢。網龍（00777）一話賣掉手遊業務，股價亦失去再大升動力。

所以話，揀呢類股，都要睇下公司有冇同手機、互聯網等跨行業的創新能力，若然只單靠現有業務，往績一眼睇晒，跟炒到咁上下，估值偏高，吸引大戶掟貨獲利亦可予理解，與其博反彈，繼續主攻強勢股的勝算可能會較高。

古勝