孖妹S檔案：80後財女 比資色

Jessica：唔驚市chok 跟大勢炒作

近日市況反覆，但我哋最擔心嘅，唔係大市炒消息，而係在大戶舞高弄低時未能跟上勢頭。但港股尚算健康，現正處於合理水平，長遠會穩升，只是短期因美國既傳退市，又傳出兵攻打敍利亞，再加上亞洲出現走資潮，先至搞到港股立立亂。

雖然今年投資有賺有蝕，但除笨有精，整體回報約有7至10%，尚算OK喎！Touch wood講句，近年買股票都冇大蝕，僅今年睇錯市買入紫金（02899），最終蝕15%離場。幸好組合有其他股票分散風險，如之前在70元水平買滙控（00005），恰好上月在89元高位放出，故此在拉上補下後，今年成績表算是有所交代。

買同仁堂國藥賺五成

要投資有道，先留意時事，因政局發展對股價有莫大關係，如近日中資股受國策推動而轉強，回報潛力較高。最明顯的是能源股及醫藥股，股價一直偏強，我於三個月前買入同仁堂國藥（08138），現已獲近五成回報。該公司既有品牌效應，又可受惠內地醫藥需求，若股價隨大市回吐，我會再增持作中長線持有。

Claudia：冧市撈盈富 穩陣博升

我份人好保守，寧願賺少啲，都唔想冒險，故多年來偏愛儲外幣。我在十年前已買入紐元，在複式效應下回報亦甚為可觀。只可惜近年外幣的投資潛力已大減，所以我會增加注碼到股票上，於是我趁近日大市回調吸納盈富（02800），一來可涉獵一籃子股票，較為安全，二來我看好恒指前景，將在壞消息傾巢而出後好轉，年底前有機會升至25,000點。

內險股有睇頭待分析

但在個股方面，暫未有心水選擇，如早前曾分析港鐵（00066）的財務報表，才發現其盈利能力不如想像般大，因而放棄入市念頭。

另我亦有留意內銀股表現，惟近年股價升得少卻跌得多，突破動力欠奉，所以齋睇冇買。至於內險股走勢似乎挺好，但要花工夫分析業務前景，可惜平時工作較忙，未能分身注視股市。因此，目前我會炒市不炒股。

Baba：大市睇二萬 絕地反擊

我早前在升市時，已把大部分股票沽售獲利，但因我對後市看法較負面，暫未有入市打算，料港股會跌至20,000點水平，屆時才是低吸時機。

目前計，年內回報僅8%，由於投資金額較往年少，成績較往年遜色。猶記得去年tip中領匯（00823），短短一個月便賺到四成利潤，而今年則主要來回炒賣巨騰（03336），因該公司受智能手機及平板電腦等商機帶動，回報利潤不俗。只不過三年前以0.6元買入的大冶有色（00661），現時僅跌剩0.194元，惟有暫時hold貨，睇吓遲啲會否回升啦！

Ching：趁內銀市場化 賺一筆

近日港股好似冇乜主見，外圍一有風吹草動便跟隨跌市，大戶更藉機炒上炒落，散戶難以跟勢，所以目前最好以不變應萬變！

由於方向未見明朗，所以我亦不敢亂做買賣，僅在三個月前以5.2元買入建行（00939），現已升近一成。事實上，因受地方債等問題困擾，早前內銀股已大幅下挫，近日可隨內地經濟回穩而帶頭反彈，加上內地正進行經濟改革，內銀將邁向市場化，股價走勢轉趨正面。

資源鋼材股就返家鄉

之不過，我手上亦有為數不少的蟹貨！於兩年前看好國策扶持而在高位買入內地資源股及鋼材股，怎料股價卻受硬着陸等陰霾影響而下挫，近日雖再受國策帶動而回升，但仍未返回當時高位，但前景已轉趨樂觀，返家鄉之期似乎不遠。

Stephanie：主力炒輪 「刀仔鋸大樹」

由於本金少的關係，我會追求高回報的投資產品，暫時會主力買輪，冀在兩年內用三萬賺十萬！

我偏愛買賣窩輪，因槓桿效應，可於短時間內獲取較大利潤，會有「刀仔鋸大樹」的心態，如上月初我在短短數日內便可獲三成利潤。不過，其後恒指突然下瀉，那三成利潤全數蒸發之餘，仲要倒蝕本金！當時曾諗過止蝕，但因對後市表現樂觀，便繼續持有直至大市回升，最終能升回買入價，有驚無險！

利豐騰訊Call有胡食

事實上，港股雖受外圍消息困擾，但升市的基調甚強，所以我近日以投資恒指Call輪為主。另除恒指輪外，我亦會買入強勢股的窩輪，早前透過利豐（00494）及騰訊（00700）認購證獲利。不過，有時我會太過進取，如上月底買入貼價的末日輪，點知恒指卻在翌日下跌近五百點，最終末日輪因而certified（宣告死亡），好彩注碼細，才不至於損失嚴重，並上了一堂寶貴的投資課，以後不會咁冒險。近日港股走勢反覆，我會觀望為主，睇定啲先再入市。

散戶 Jessica

投資經驗：5年

年內回報：7-10%

散戶 Claudia

投資經驗：10年

年內回報：3%

散戶 Baba

投資經驗：5年

年內回報：8%

散戶 Ching

投資經驗：6年

年內回報：10%

散戶 Stephanie

投資經驗：1年

年內回報：5%

高妹、彩兒

若有料報畀高妹同彩兒或有嘢問，可電郵money.biz@opg.com.hk