絲絲收到風，曾經因為同「股神」巴菲特食過飯而揚名嘅中國私募基金教父趙丹陽，事隔多年後，透過旗下嘅基金「赤子之心資本市場亞洲」（Pureheart Capital Asia）再次投資喺中資股，而且比重由今年初嘅五成，升到八成添！
喺○八年，趙丹陽就因為中國市場冇乜吸引嘅投資機會而「撤資」，將「赤子之心」旗下嘅5隻人民幣股票基金清盤，絲絲聽聞合計資產有成2億美元呀！
咁啱就喺同一年，佢用咗211萬美元，喺網上投到同「股神」巴菲特食晏嘅機會，唔知係咪得到「股神」教路，過去幾年佢「轉攻」印度，但回報就麻麻哋。
不過，由今年年初開始，「赤子之心」再次將資金回歸內地，單單七個月已經有成24%回報。
絲絲收到風，呢個成績跑贏晒亞洲區嘅行家呀！連趙丹陽都話，對內地市場愈嚟愈有信心，事關內地股市經歷咗6年嘅調整之後，依家已經接近歷史低位，正正係入市時機呀！趙丹陽仲話，睇好嚟緊消費品股同藥業股將會有牛市，所以先至大手入市呀！