絲絲講場：港慢兩拍 阿里斟美上市

絲絲從密友口中得知，積極協助阿里部署嘅投行賓架，近日就同阿里高層飛赴美國，為一旦啟動美國上市做好準備，而美國上市方案，更已獲管理層初步拍板，香港對阿里呢單超級IPO爭奪嘅贏面，似乎未必如之前所預期咁高！

投行傳諗計助選香港

根據阿里嘅官方說法，管理層對上市保薦人、地點與時間表仍未作出任何決定。亦即係話，阿里到目前為止，似乎仍未完全放棄在港上市嘅努力。市場亦有傳聞指，有投行正努力尋求提供一個「創新的另類方案」，使到阿里可在不削弱管理股東在董事局控制權嘅前提下，按規管要求實現在港上市。

據絲絲密友告知，阿里內部其實一直希望上市計劃於年底落實，所以投行一直有為阿里，定出喺美國上市提出全套方案。

月底冇突破即揀美國

賓架同阿里高層近日赴美，就係要為啟動紐約上市作好準備，而相關方案已獲阿里管理層初步拍板。呢位密友仲話，若香港上市嘅技術問題，喺月底前仍未有突破，投行團隊就會全面啟動美國上市嘅各項工作，以免阿里上市日期一拖再拖。睇嚟小加總裁咪一味得個講字，唔係就會白白走咗單大刁喇！

余詩韻