絲絲講場：高鑫搞網購「飛牛」送貨
內地零售商呢幾年嘅戰火一直旺盛，扭盡六壬要去開源吸人仔，外資高鑫零售（06808）都唔例外，無耐前宣布成立上海飛牛直達公司，發展電子商務新平台，配合全民網購時代。不過，原來佢哋諗呢個名時，都用咗唔少心思。
高鑫零售執董兼大潤發中國董事長黃明瑞話，起名時先發覺好多名字早已被登記，後尾發現好多出名嘅網站，都以動物命名，好似貓、狗都有，所以就有樣學樣。
冀年底達30萬種商品
剛好內地人又鍾意用「牛」嚟形容厲害，於是決定加多對翅膀俾呢隻牛，變成寓意生意飛升嘅「飛牛」。同時，為咗反映直接送達貨品給客人嘅服務，「直達」亦加入名字之中。
高鑫預計，今年第四季起就會為上海地區顧客開始配送服務。黃明瑞仲話，推出初期商品種類達10萬，今年底將增至30萬，明、後年目標則為100萬。佢講到明，網購平台係獨立營運，將會比大賣場實體店賣更多唔同嘅種類，包括時裝，最終希望一日之內將貨品送到客人手上。他覺得，內地網購市場龐大，競爭唔算大，所以唔會打價格戰。
余詩韻