卸任無幾耐嘅英倫銀行前行長金默文，大大話話做咗廿二年，英倫銀行賀佢退休嘅禮唔算好厚，但一樣畀人狂插。
尋日英國傳媒報道，金默文收到三份禮物，最貴係一幅值1萬英鎊嘅肖像畫，其次係價值2,205英鎊、德國大文豪歌德嘅雕像，同埋值597英鎊嘅銀製餐巾套環。
此外英倫銀行仲搞咗一場盛惠4,672英鎊嘅晚會，同埋兩場分別使咗3,450同3,800英鎊嘅晚宴歡送佢，所有嘢夾埋使咗接近2.5萬英鎊（約30萬港元）。
30萬港元其實唔係好多錢，但都畀英國傳媒鬧爆，明知國家厲行緊縮政策，英倫銀行都仲咁大使，《每日郵報》篇報道標題劈頭就鬧「What austerity？」（緊咩縮呀？）
英倫銀行就話筆錢經過董事會審批，肖像畫同銀製餐巾套環係例牌必送嘅，而每位行長都有權揀自己份退休禮物，例如金默文前任佐毅達揀件傢俬仲貴過歌德像喎。
金默文喺一○年力撐財相歐思邦嘅緊縮政策，搞到全民要捱，加上蘇皇（RBS）同萊斯（Lloyds）獲政府注資，畀人覺得英倫銀行浪費公帑，但依家自己每年袋廿幾萬英鎊退休金，難怪英國人咁慶嘅。
余詩韻