絲絲講場：張耀堂話咁快退休

八達通行政總裁張耀堂（Sunny），坐咗CEO個位兩年幾，話咁快就宣布明年一月退休，Sunny講笑咁話，喺通知公司董事局退休決定之前，首先要經過太太批准，囝囝仲打趣咁問佢：「咁第日啲學費點算呀？」所以話呢，重要決定都係要有屋企人嘅支持！

呢位Nice guy即將步入人生新嘅一章，佢話自己做咗四十年嘢，都係時候要休息一吓，其實佢喺銀行界任職多年，於一一年初加盟八達通，好多銀行運作佢都好熟，大有條件出返本書，講下賓卡生涯。對於第日退休後嘅大計，Sunny強調自己係普通人，嚮往過平淡嘅生活，得閒去山頂行吓，同朋友打吓波，已經係一大享受。

佢仲透露咗自己最大嘅願望：「希望第日去旅行嗰陣唔洗再唸住啲公事，又唔洗再時刻Check住email，假期可以真正Relax啦！」仲話退休之後一定會繼續留意銀行業同八達通相關嘅新聞添。

離出年仲有一段時間，Sunny話依家會畀心機，同同事一齊努力，做好手頭上嘅工作，再開心迎接退休生活！

余詩韻