Market Insight：手機相關股未炒完

再睇埋沽空成交，昨反而減少2.5億去到69.8億元，佔成交比例跌至超過一個月新低的8.99%。一句講晒，買貨的積極，沽空的審慎，港匯已升到7.7545，是踏入八月以來最強。早兩日已提過隻華晨（01114）業績唔錯，半年賺20.3億人仔急升52%，中央打貪對寶馬合營的影響顯然過慮，股價昨抽升6.9%報11.4元，帶埋其他幾隻汽車股都炒埋上去。

利豐（00494）半年業績大跌69%至9,600萬美元，感覺有點為淡而淡的瑞銀，唔使問阿貴都知佢畀沽售評級，睇9元，其中一個理由係話管理層今次無畀三年營運目標感到失望！畀目標後做唔到，定係唔畀目標衰啲，古勝唔識分，但姑勿論點，大倒退業績曝光後，利豐股價狂抽11.5%報11.76元，真係好耐未見咁嘅場面。

古勝冇點你 2013/08/16

萬里長空

利豐回補年初裂口

睇番利豐全日1,373萬股沽空佔成交8.6%，但已經係長期被唱淡的利豐近三個月來僅僅兩次沽空比例低於一成的日子。表面上，美國經濟復甦步伐早過歐亞，炒火鳳凰重生概念，但實質全人類睇淡，挾爆班淡友先係勁升源動力。到底可挾到乜位？咁長時間被沽空，睇嚟補番年初的下跌裂口11.98至13.76元都唔出奇。

近期內地經濟數據有見底迹象，中資股有番些少鑊氣，但論到今年長炒長有，定必係一堆網絡股，以及受惠中國2G轉3G同4G的智能手機商及設備股。近日盛傳蘋果公司拍板會在九月十日於加州作新手機發布，「膠味」極濃的iPhone 5C亦在網上瘋傳多時，估計係針對新興市場，尤其為中國中低價山寨智能手機市場打造，定價估介乎200至250美元。

到底iPhone 5C個「C」代表乜？Color、Compact定係Cheap，古勝就話係China。睇近日中移（00941）由75元衝上嚟虎虎生威，會唔會係新iPhone終於支援中移TD網？今趟發布會確實令人期待。

新產品再成催化劑

講番今年幾個沾到外國品牌貴氣的本地設備股，真係升得好誇張，開始專戰平板及手機OGS觸控屏幕的信利（00732）累積升176%；有份做HTC ONE一體化鋁質機殼的比亞迪電子（00285）升102%；生產手機用鏡頭的舜宇光學（02382）升66%；替iPhone、iPad生產微型喇叭的瑞聲（02018）升43%。

舜宇半年業績收入及純利分別升57.4%及25.7%，至27.8億及1.97億元，盈利升幅不及銷售額緣於毛利率由19.1%跌到15.8%。老實講，在下對舜宇了解有限，但作為OEM及ODM生產商，毛利率係產品競爭力寒暑表，上半年舜宇八成光學產品是五百萬像及以下的鏡頭，如果iPhone 5C主攻低價市場，可以話對舜宇客仔直接挑戰，一三年14至15倍市盈率左右，唔貴但要上番去五月高位，似乎要產品技術有重大突破，例如千三萬像素鏡頭出貨比例大升至掂。

今日輪到瑞聲派成績表，iPhone 5無估計咁好賣，接單量可唔可以由冒起的中國手機公司及南韓兩大巨頭取代，今次應見真章。金英報告估第二季賺5.31億人仔，按年升31%，但同第一季5.34億人仔相若，目前公司大約佔高端智能手機喇叭市場三成份額，議價能力較佳亦令過去毛利率表現相當優異。

古勝其實真係有些少想份業績差，等股價跌番多少，事關依家個個都睇實蘋果公司、HTC同Sony下半年推的新機，刺激設備股業績及股價再炒一浸。

電力股吼時機翻炒

煤炭及電力股繼續玩搖搖板遊戲，神華（01088）、兗州煤業（01171）及中煤能源（01898）昨跌2至4%，反觀五大電力股華能（00902）、中國電力（02380）、華潤電力（00836）、華電（01071）及大唐發電（00991）升幅介乎2.3至4.2%。事實上，煤價係有反彈，但供大於求問題嚴重，尚未足以轉勢，煤炭股反彈到咁上下，又要抖抖氣，睇睇需求面恢復情況再覓方向。

反觀電力股可炒維穩之下電力需求回升、煤炭成本能見度高，故電力股仍處相對強勢，不妨緊跟資金流短炒一轉，睇走勢華能都唔錯，可以望多兩眼。

古勝