短炒王：味千中線買得過
味千（中國）（00538）獲大行瑞信唱好，周二股價勁升6%至8.35元，是一二年五月以來高位。早前，味千發出中期盈喜預告，但未有提及盈利增長的幅度。
而回顧去年同期表現，盈利4,693萬元，大跌82%，是○七年上市之後最差的成績，惟經營情況到下半年實際已有改善，期內盈利1.07億元，令全年盈利達1.54億元，即上半年佔比只有三成。其實，去年比較基數低，今年上半年大幅增長，唔算特別意外，惟參考埋同店銷售，增長由一一年下半年跌26%到一二年第三、第四季錄得2.3%及3%增長，到今年首季再升1.6%，改善持續。
集團去年底持現金達16.5億元，銀行貸款只有6,000萬元，早前聘用了香港麥當勞前董事總經理劉士盛為新任營運總裁，又計劃透過新品牌搶攻市場，兼分散風險。
股價較半年前低位5.12元累升六成三，升幅跑贏大市，亦跑贏翠華（01314）及稻香控股（00573）等其他上市飲食股，高位追入要有相當勇氣，而市場對其前景仍存疑問，味千可能要更多時間來證明業務復甦的持續性，不過公司本身有財力，捱得過連番挫折，經營能力唔差，中線可取，下一阻力位睇10元。
達哥