股神巴菲特份人一向為善最樂，為咗慈善，每年都會透過喺Charitybuzz.com拍賣同佢共進午餐嘅機會，仲年年刷新善款紀錄。
之不過，股神今次就實行化身為現實版嘅「朱古力獎門人」，將佢旗下嘅時思糖果（See's Candies）工廠嘅「半日任食之旅」，拎埋出嚟拍賣兼且做善事！
呢項拍賣上個月尾開始，啱啱尋日先結束。拍賣開始時嘅底價係1.7萬美元，最後一日嘅拍賣價曾經由5萬美元飆升到11.8萬美元，最後由一位匿名股神粉絲以15.6萬美元（約121.7萬港元）奪標。
中標者可以帶埋另外三位朋友一齊參觀位於洛杉磯嘅工廠，由工人親身示範各式糖果同朱古力嘅製法，期間當然可以免費任食各種糖果同朱古力。今次拍賣籌到嘅款項，將會捐畀當地嘅非牟利組織「Communities in Schools of Los Angeles」，用嚟資助一個防止高中生失學嘅項目。
雖然日理萬機嘅股神唔諗住擔任導遊，不過佢都會露面同中標者影相，仲會喺佢本自傳上簽名留念。絲絲聽講，巴菲特仲可能會親自示範食棒棒糖嘅正宗食法添啊！
余詩韻