現時智能手機市場嘅競爭愈演愈烈，一唔小心隨時就會畀其他對手打低。好似台灣智能手機品牌HTC咁，前排網上誤傳佢哋賣盤嘅消息，搞到HTC要即刻出嚟澄清。不過董事長王雪紅似乎唔多放心，之後仲親身講吓公司嘅近況，振奮一下軍心添。
雖然HTC真係遇到好多挑戰，但呢位女強人似乎無乜受到打擊，佢仲好大方咁承認公司嘅缺點。佢話，今時今日HTC最大嘅弱點就係營銷方面做得唔夠好，簡單啲講即係「唔接地氣」。
絲絲都係諗咗一陣先明，原本佢覺得HTC營銷嘅問題係唔夠直接同通俗，令到消費者唔可以即刻Get到佢哋想表達嘅訊息！所以HTC今後要做到「更接地氣」咁話！其實曾經有媒體將HTC同三星做比較，指三星所用嘅宣傳費用比HTC多幾倍。王雪紅都認同，HTC係一間比較「後生」嘅公司，承諾以後會加強番呢方面嘅工作。
除此之外，王雪紅喺訪問入面提到「創新」呢一環，佢覺得「蘋果教主」喬布斯嗰種創新嘅念頭，唔係間間公司都可以搬字過紙，所以HTC都只需要堅持行番自己嘅「創新路」就可以。佢將HTC產品定位成「謙虛嘅創新」，仲話唔一定係貴價嘅智能手機先可以創新，平價嘅Model一樣得！
最後，王雪紅仲講到，建立一個品牌係需要堅持，佢會樂於面對唔同嘅挑戰。絲絲聽完王總嘅一番話之後，完全感受到佢嗰種氣魄，相信HTC由呢位IT界女王帶領，未來一定可以做到好成績！
余詩韻