絲絲講場：澳元貶值帶挈學費打折

但絲絲發現，最近滙豐銀行公布咗一份調查報告，表示可能好快就會褫奪澳洲「學費最貴」嘅稱號。當中原因就同澳元年內兌美元匯價大跌好有關係。

跌逾一成 留學生勢增

呢份報告顯示，澳洲係全球接受高等教育最貴嘅國家，一年嘅使費盛惠38,000美元，計番即係差唔多三十萬港元！其實使費咁貴，最大原因都係澳元匯價強勁，喺○九至一二年期間，澳元兌美元匯價升咗五成咁多，而去澳洲留學嘅人數都喺呢段時間減少12%。

不過滙豐嘅調查指，近排澳元匯價開始回落，今年兌美元已經下跌12%，加上辦理澳洲簽證嘅手續簡化，預計留學生人數好快會升番。

根據呢份調查報告，美國同英國嘅學貴都係全球數一數二咁貴，一年分別要價35,000美元及30,000美元。就連香港都入到呢個「學費榜」Top 10，一年學費總共22,000美元，即係約十七萬港紙。

計絲絲話齋，一班望子成龍嘅父母最好就快啲幫仔女儲定教育基金喇！