絲絲講場：埃利森：Apple失教主冇靈魂

自從「蘋果教主」喬布斯過身後，蘋果公司就好似冇咗靈魂咁，推出嘅新產品都畀外界批評無創意。就算現任CEO庫克點力挽狂瀾都好，似乎都阻止唔到大家懷念喬布斯。

就連甲骨文CEO埃利森都話，失去喬布斯後嘅蘋果公司正處於迷失當中，並唔睇好蘋果公司嘅前景咁話！

最近埃利森接受咗一個電視台嘅訪問，期間記者問到佢點睇喬布斯時，佢就形容呢位好朋友擁有非凡嘅才華，係一名傑出嘅發明家，更係IT界嘅愛迪生同畢加索。絲絲睇得出佢嘅言談之間，其實仲好掛住喬布斯。

之後記者再追問佢，點睇無咗喬布斯嘅蘋果公司，埃利森就有啲猶豫，話大家其實已經知道結果。當講到「有喬布斯嘅蘋果」時，埃利森舉起手指公，但講到「無喬布斯嘅蘋果」，佢就放低隻手指公。埃利森呢個動作即係話畀大家聽，蘋果無咗喬布斯之後好唔掂！

埃利森呢番言行真係明剃庫克眼眉，絲絲惟有勸庫克再加把勁，做出一番成績出嚟啦！