Market Insight：航運股係時候發威

唔少基金經理，已紛紛加入衝浪行列，亦因為睇淡得太耐，扭轉投資組合錢多貨少的情況，唯有狂追要幾多有幾多的內銀股。昨日三大藍籌內銀升幅介乎2.2至3.1%，三隻股票貢獻恒指95點，相當於大市升幅三成五。

按過往玩法，基金掃完內銀及內險一堆大球場之後，下一輪好大機會，會追番到落後兼啤打值高的中小型股，估計水泥、內房、鋼鐵及大落後的航運股，短期中國經濟可能觸底及中央下半年保增長的意欲增加下，好有機會成為下一浪基金追逐對象。

網股炒風有餘未盡

股王騰訊（00700）新聞多多，傳準備將微信（WeChat）分拆去星洲上市，及後公司經彭博否認，唔少賓架認為QQ網上遊戲高峰期過去，未來食粥食飯要睇微信，個市亦因為咁，對微信分拆消息特別敏感。

古勝冇點你

萬里長空

今日騰訊中期成績表面世，大行預測都幾分歧，第二季盈利由最低34.76億元（人民幣‧下同）到47.5億元都有人估，相當於按年增長介乎11.7至52.7%，平均數41.35億元升32.9%，現價370港元計，一三年預期市盈率30.4倍，一四年是微信與舊有業務收入的交接期，騰訊盈利增長好有機會由過去兩年的約兩成，跌到約一成，值唔值咁貴見仁見智，但依家買網股講基本因素實會畀人取笑，個個睇實第四季上市的阿里巴巴集團，幾間外資行放風的估值一如海鮮價，估計定價之前，成個網絡股行業，估值會繼續癲完再癲。

華晨汽車（01114）半年業績，純利20.29億元，較去年同期升52%，管理層透露年底實現30萬輛年產的目標問題唔大，在引入一種新車款後，估計一六年產能倍升至60萬輛，明年目標銷售額維持30%增長，半年業績差不多等於大行預測一三年全年的六成五，公布業績後被重估機會唔細，昨日升1.3%報10.66港元見四個月高位，看來升勢無咁短癮。

反而姊妹公司引擎生產商新晨動力（01148），中期業績麻麻，收入及盈利分別跌7%及5%，但人人都睇實可能獲寶馬授權生產5系轎車專用的N20引擎的消息，昨日股價早市急插落2.9港元後，戲劇性拗腰倒升一格收市報3.19港元，證明有古仔配合，有時會比業績影響力更大。

中遠睇位搭順風車

五、六月中央打假下內地出口數字差到離譜，六月更加出現負數，亦令上星期公布七月份出口回復5.1%增長，寧舍令市場振奮。其實，唔少航運類股份早在五至八月初期間，唔單止無破底，唔少仲企穩兼造埋圓底出嚟，當中包括中海發展（01138）、中海集運（02866）、中外運（00598）、中國遠洋（01919）及中遠太平洋（01199）都有咁嘅情況，好消息唔升或者有圍外人唔知的毛病，不過壞消息唔跌，或者意味負面因素已充分反映在過殘的估值身上。

過去四年蝕咗三年的中遠，七月底仲出過盈警預告上半年要蝕7.3億至14.6億元，股價不跌反升，話就話比一二年上半年狂蝕49億元好些少，但仲係低過市場預期一截，但既然個市炒中國經濟復甦，遲早都要碰航運股，睇四月開始幾次反彈都受阻於250日線，昨日抽上3.55港元，同阻力3.59港元只差一步之遙，長揸就可免就免，如果破位可以搭番轉順風車。

游資追逐落後股份

中資股氣氛有改善，就連一直弱勢的內銀同內險股都有起色，若然呢批傳統板塊繼續走高，古勝相信可吸引更多游資發掘炒落後對象。食品股中，乳品股繼續領跑，雅士利（01230）股價又創新高，合生元（01112）升1%。

反觀其他食品股，雨潤食品（01068）上月下旬急升後整固至今，股價似乎唔多跌得落，近兩日成交有所增加，可小注一試，一旦再次起動，目標挑戰5.8至6港元阻力區，跌穿5港元止蝕。

古勝