Market Insight：手機股係時候儲貨

目前距離聯儲局九月議息會議仲有成個月，會悶足成個月等伯老指示，抑或先來個似樣回吐？古勝估係後者機會較高，技術上，如果道指短期跌穿15,400點，或者會有較大幅度的調整。

連跌兩日後，昨日港股跟中國七月份進出口數字，齊齊呈現反彈，大市由最多升近200點，到收市升得67點，報21,655點，對比前日跌市517億元成交，昨日縮近90億得427億元。急跌後，看來基金經理仲未有興趣即時再入市，資金只集中在中期業績有驚喜的股份。

古勝冇點你 2013/08/09

萬里長空

技術上，恒指跌穿10日線（昨在21,932點）之後，多個技術指標都顯示市況動力減弱，加埋早兩日大插插，散仔輪場流入牛證的資金唔少，睇怕今次調整未完，月內見一見21,000點樓下，一啲唔出奇。

必要留意兩項數據

中國七月進出口分別按年增長10.9%及5.1%，同市場預期的1%及2%升幅比較，好成一大截，亦係中央嚴打「假出口」之後的新高，消息刺激昨日人民幣匯價創過匯改後新高，兌美元見6.1138。

值得留意，今日一堆數據出台，九點半曝光的七月CPI及PPI，彭博綜合大行估計分別升2.8%及負2.1%，下午公布七月工業生產年率估升9.2%，七月城鎮固定資產投資估升20%，七月零售銷售估按年升12.8%，中央有冇彈藥作適量的寬鬆，以及內地消費市道係咪估計咁差，要睇實七月CPI及零售銷售增長，前者宜低，後者宜高，反之，對後市發展不利。

中國聯通（00762）昨日發布業績「蝦碌」，國資委網站截胡，比公司更早披露份成績表，搞到聯通臨收市都仲要拉閘，最終被掃高2.6%報11.54元。聯通中期淨利潤按年升55%至53.2億元（人民幣‧下同），營業收入1,443.1億元升18.6%，來自服務收入升13.8%至1,164.8億元。

聯通年內不易大升

中移（00941）焗住搞TD讓半臂，聯通3G業務處於不一樣起跑線上，中期盈利比估計高3%左右。業績原動力是來自期內的3G業務，用戶按年增加73%至1億，佔總用戶比例38.2%，但收入按年上升52.1%至409.1億元，佔移動服務收入比例56%，3G用戶上半年平均ARPU為77.6元，高於傳統的2G ARPU。

業績增長亦同3G補貼低過預期有關，期內手機補貼42.2億元，佔3G收入比例，由去年同期13.1%降至10.3%。預期市盈率20.1倍，估計一三至一五年上半年，是3G貢獻攀升得最明顯的一段時間，一四年市盈率估計回落至14.6倍左右，年初至今股價跌7.1%，表現一般，同高估值預先透支3G增長有關，樂觀估計，今年聯通股價有一成至一成五升幅（即12.7至13.3元），已算交到功課，可能的風險，包括高過預期的4G投資，以及傳聞內地可能向三間電訊商各發一面TD 4G牌。

講開3G手機，TCL通訊（02618）七月份付運數字幾標青，總手機付運量按年升70%，按月都有23%升幅，去到500萬部，六款TD 3G手機推上月推出，智能手機付運140萬部按年升1.47倍，佔總付運量28%。

隨着3G用戶增加，今年大行都睇好價廉物美的內地品牌，估計逐步爭取到更大市佔率。TCL通訊今年四至五月，短短一個月內由2.23港元炒上4.49港元，隨即以大型三角形消化升幅近三個月，似乎去到決勝負時刻，估計未來幾個月3G付運量都會唔錯，升穿3.5港元的話要睇實。

煤股值博率唔算高

內地報道煤企部署集體加價，龍頭神華（01088）升1.6%，中煤能源（01898）升2.4%，兗煤（01171）升4.3%，恒鼎實業（01393）升5.6%，永暉焦煤（01733）升19.1%，消息話秦皇島仲係一個個黑山，堆滿晒煤，煤商真係有加價條件，古勝唔多信。既然個市連航運股都炒埋，煤炭股再唔彈都於理不合，但客觀環境，如果內地經濟好到煤商可以加價，咁其他工業及電力類股份，應該更加吸引。

古勝