絲絲講場：H股二十歲 李業廣話當年
H股登陸本港股市，話咁快就廿年，尋日港交所（00388）就搞咗個慶祝儀式，H股嘅靈魂人物，有股壇教父之稱嘅港交所前主席李業廣，自然成為全場焦點。大家成日話，冇李業廣就冇H股，但李業廣就話，當年任副總理嘅朱鎔基至係H股來港上市最重要人物。
朱鎔基拍板創佳話
李業廣話，事關九三年中國都未有公司法、證券法，會計制度又未同國際接軌，內地企業來港上市，喺當時的確係遇到好艱難嘅問題，好多人甚至話不如成立另一個專為中國公司上市而設，質素較低、買者自負嘅上市平台算數，但朱鎔基當年好有遠見，認為毋須對內地公司作特別處理，一錘定音話要按照國際標準來港上市，即係話訊息披露、會計制度、投資者保障等，統統都要符合國際標準。
結果呢？斷估都唔使絲絲多講啩！好明顯，呢個決定，改寫本港股市歷史，中國企業已成為本港股市重要支柱，香港進身為國際金融中心。教父話朱鎔基係功不可沒！
6月底，H股市值已達4.2萬億元，佔總市值20%，計埋紅籌同民企更達11.5萬億元，佔總市值逾半（55.9%）。依家內地企業成交額佔總成交達71%。如果冇咗內地企業來港上市，香港股市市值依家都唔知喺全球排第幾？
余詩韻