絲絲講場：永豐元朗插旗搶北水
港股成交持續低迷，證券行生意應減少，但偏偏有證券行逆市擴充，仲特別揀喺元朗開舖，話因為較近內地，方便個人遊嘅投資客幫襯。
永豐金融尋日元朗新舖開張大吉，除咗有舞龍舞獅助興外，仲有財神爺派利是，吸引咗大班街坊圍觀，場面非常熱鬧。該公司研究部主管涂國彬（Mark）仲同絲絲講，原來元朗舖係永豐首間分行，佢話公司近年大搞手機上網投資平台，留意到市場有需求，所以想開分行擴展業務網絡，一方面照顧到元朗區的街坊客之餘，仲可以收宣傳之效，吸引埋內地個人遊客戶嚟開戶！
生意暢旺唔怕競爭
不過，絲絲喺附近行咗個圈，發覺沿途一帶已有近十家券行，咁競爭咪好大？阿Mark就講笑咁話，用番商人去非洲賣鞋嘅故事嚟睇，當個個行家都喺元朗插旗，反而證明呢度係有利可圖，只要做好服務，絕對唔怕競爭！講到下半年港股表現，阿Mark就認為走勢會繼續呈上落市，建議要密切留意金價同日圓走勢，因為往往會對環球股市走向有預示嘅作用。