絲絲講場：花旗開班幫客教仔女

依家仲係八月嘅悠長暑假，之不過作為新一代年輕人，當然係趁住假期四出學習啦！花旗香港商業銀行幫企業客戶嘅一班仔女「開班」，等佢哋提早吸收多啲知識，點知花旗香港商業銀行主管郭炬廷就話知識係其次，年輕人反而應該要畀心機學點樣建立人際關係！

呢班後生仔尋日開學，郭炬廷急不及待塞錢落佢哋袋啦！「上堂固然緊要，不過最緊要係建立人際關係，今日坐喺你身旁嘅同學仔，可能成為你日後嘅好朋友，甚至係生意夥伴。」雖然好似講到好現實咁，但現實中又真係咁喎！

喺資訊發達嘅廿一世紀，上網有大把「知識」，反而人際關係就需要用心經營。今次有32位來自不同背景嘅年輕人參加活動，一齊北上參觀廠房，又一齊入營，真係日對夜對，分分鐘會變成大家嘅好朋友，所以，喺吸收知識嘅同時，都要互動啲！