絲絲相信，好多投資者都會封國際投資者索羅斯做偶像，絲絲就聽講，原來索羅斯對班「擁躉」都幾好o架，事關早前佢就話會有獨家投資秘訣「醒」吓啲粉絲咁話。
根據索羅斯提供嘅「十二個投資真理」入面，有一個令絲絲最印象深刻！事關索羅斯話經濟史入面係永無止境嘅謊言，佢仲話「人類其中一個缺點就係鍾意馬後炮！」就算可以用語言解釋到嘅事件，都唔代表個解釋係啱，叫投資者唔好盡信呀！索羅斯仲提醒大家，一定要重新思考經濟理論，因為倣效效率市場假設、理性選擇理論嘅公司，到最後統統都破咗產，就好似雷曼兄弟咁呀！
絲絲相信，好多投資者都同索羅斯一樣會留意投資產品嘅「期望價值」。索羅斯就提醒投資者，就算投資策略同其他人唔同，但係都一定要喺個「期望價值」入面，唔可以超出特定範圍。佢仲提到「對投資者嚟講，最重要係知道投資正確嘅時候會賺到幾多錢；同時要知道，投資錯誤嘅時候會蝕幾多錢！」千祈唔可以盲舂舂入市！
不過，絲絲最佩服都係佢對自己嘅眼光有百分之百信心，無論投資正確定係錯誤，佢都有信心可以解決到問題！佢提到，「如果你覺得自己嘅贏面大，就要落多啲賭注，務求令自己贏得最多！」
最後佢就話，我有錢，係因為我知道自己咩時間犯錯，而且我會去改正錯誤！所以佢希望投資者遇上投資失利時，唔可以覺得錯係好「丟架」，因為唔識得改正自己犯嘅錯先係最「丟架」嘅事！